Тиімді тәжірибе қарлығаштары

10 маусымдағы кезекті ректорат отырысында сертификат табыстау рәсімі орын алды. Мұнда оқытушы-профессорлар құрамының, қызметкерлердің жетістіктері, студенттерге әлеуметтік қолдау көрсету мақсатында атаулы шәкіртақылар ұсыну, өзге де игі шаралар дәстүрге айналғаны белгілі.Бұл жолы Гази университетінің студенттері марапатталды.

Сөз алған мемлекеттік тіл кафедрасының меңгерушісі Анаркүл Салқынбай академиялық ұтқырлық бағдарламасының студенттерге зор мүмкіндік сыйлап отырғанын алға тартты. Түркия елінің тәлімгерлері біздің университетке үлкен қызығушылық танытып келген. Олар ақпан және маусым айлары аралығында филология, әдебиеттану және әлем тілдері факультеті, қазақ филологиясы мамандығы бойынша білім алды. Қазақ тілі мен әдебиетіне қатысты бірнеше пән оқыды. Бүгінде қазақ тілін айтарлықтай меңгеріп, білім қоржындарын қазақ елі жайлы құнды деректермен толықтыра түскен студенттерге университет атынан құрметпен сертификат қоса берілді. Олар: Тамер Йылдырым, Гөзде Жөкева, Гөнжегүл Тәңіріберди, Айшегүл Өрсеоглу, Мушереф Чукадар.

Түркия студенттері көңілі дарқан, кең байтақ қазақ жерінен алған әсерімен қазақ тілінде бөлісті. Біздің университеттен өткен шетелдік тағылымдаманың олар үшін қызық әрі пайдалы болғандығын айта келе, ризашылықтарын білдірді.

Әйгерім ӘЛІМБЕКОВА