Арманға жетелеген ұстазым

Адам баласы өмірге келген күннен бастап, әр нәрсені танып-білуге ұмтылады. Кішкентай сәби сөйлеуге, тәй-тәй басуға ұмтылса, білімге ұмтылған жастар әділдікке, еліне өзіндік бір пайда әкелуге, жаңалықтар мен жаңа технологиялар ойлап табуға ұмтылады деп ойлаймын. Дәл осылай жастарды білімге баулып, тәрбие беріп жүрген, студенттерді әрқашан биікке жетелейтін білікті ұстаз химия ғылымдарының докторы, профессор – Баешова Ажар Қоспанқызы туралы айтқым келеді.

Мектеп қабырғасында ғылыми жұмыспен шұғылданып, түрлі конференцияларға қатысып, белсенділік танытып жүрген оқушыларға қатты қызыға қарайтынмын. Өз бойымдағы қабілеттілігімді көрсете білсем, үлкен биік белестерді бағындыра алсам деген қиялға толы арман болды кеудемде. Алайда бұл арманым мектеп қабырғасында орындала қоймады. 11 жыл бойы білім алған алтын ұямнан самғап ұшып, көкке қанат қақтым.

Қазіргі таңда әлемнің алдыңғы қатарлы университеттерімен бәсекелес, еліміздің көшбасшы университеттерінің бірі Қазақ ұлттық университетінде өз білімімді шыңдап жатқаныма қуанамын. Үлкен мақтанышпен де айта аламын. Университетіміздің әрбір оқытушысынан дәріс алып, білімін толықтырған студенттің арманы жоқ шығар деп ойлаймын. Мектеп қабырғасындағы қиялға толы армандарыма университет қабырғасында өмірлік бағыт-бағдар берген, талай білікті мамандарды даярлаған жетекшім Баешова Ажар Қоспанқызымен ғылымның тура жолына бет алғандаймын. Ажар Қоспанқызымен жасаған әрбір ғылыми жұмысым мені шыңдай түсуде. Маған күш-қуат бергендей сезінемін. Көптеген белестерді бағындырған Ажар Қоспанқызының алдағы уақытта еліміздің түкпір-түкпірінен келген жастарды білім мен ғылымға тартып, бәсекеге қабілетті, білімді жастарды тәрбиелеп шығарады деп ойлаймын.

Өнегелі ұстазыма қызметте табыс, шығармашылық жетістіктер тілеймін. Әрқашан шәкірттерінің жеңісін көріп, арамызда аман-сау жүре бергей!

Ақмарал ҚОЖАНТАЕВА,

химия және химиялық технология факультетінің 3-курс студенті